Tornion poliisi muistuttaa rikostilastojen synkkenevän keväällä. Poliisi valistaa kansalaisia tällä kertaa meän kielellä, käännöksen on tehnyt keminmaalainen opettaja Hannu Lantto.
Luonto ja roikahleet havahtuva
Keyään ja kesän alkaminen meinaa sitä, että polisitten syntilistat synkkenevä. Tämähän johtuu melkosesti siittä, että poliisitten tiethoon tulheitten omasuusrikosten luku kasuaa aina kesäsin. Siihen vaikuttaa paljoltikki kaks eri asiaa: roikahleet ovvat saurina koko aijjan, yöt ja päivät ja tietekki seki, että ihmiset ei hoksaa suojata omasuuthaan.
Tornion poliisi halvaa vähentää omasuusvarkhauksien lukua tämmösellä ennalta estävällä ilmotuksela, jonka meininki oon saaja ihmiset kathoon paremin kampheittensa perhään.
"Kukhaan oon vieny minun potkurin, mishään mullon polkupyörä? Jos molisin lukkua käyttäny olis roikale sen rauhhaan jättäny."
Son järkheenkäypä homma se, että rosvo viepii sen, mikoon köykäsesti saatavilla. Ilman lukkua oleva polkupyörä son yksi varma kohe. Vuona 2005 Tornion poliisille ilmotethiin 80 polkupyörävarkhautta. Pyöriä rosvothiin varsinki keskelä päivää kouluitten kartanoilta.
Monet näistä pyöristä oli lyöty lukhuun omala lukula, mutta sunkhaan se riitä! Son tuomonen pyörä melko köykänen kantaa poies ja mookata lukku sitte tuhanen traasuksi jossaki kalvepaikassa. Sonki somempi, että lyöpii pyörän lukhuun vasitulla kaari- elikkä faijjerilukula vaikka pyörätelihneesseen elikkä puun ympärille. Sillon se joutuu rosvoki tekehmään melko sauhriin työtä sen pyörän etheen.
Laita lukku rosvo pettyy. Iso raha sulla säästyy.
Ja son sama peli moturikelkkojen kansa. Niittenki säilyttämisseen kannattee pikkusen havahtua katto ko rosvo viepii useastikki molemat, sen peräkärryn missä se moturikelkka leppää. Solis melko päisevää laittaa peräkärhyyn semmonen aisalukku. Moturikelkka kannattas säilyttää pikkusen kalhveessa rosvoilta, nuin niinko vaikka autotallissa, jos soon maholista.
Turvamerkintä tavaksi
Kaikhiin omhiin kampheissiin kannattee tehhä polisiasemalla turvamerkintä. Sei maksa mithään.
Turvamerkinästä oon hyötyä, katto ko sillä löyethään oikea kampheen omistaja varastetulle elikkä kaohneele roinale.
Ja tämei koske vain polkupyöriä. Soon tähelistä tehhä turvamerkintä semmossiinki kampheissiin ko perämoturi ja runsunleikkuri, katto niitähän net rosvot vievä.
Omasuuven merkintää voipii jokhainen tehhä kotohnaan. Työkalut ja autoratiot ja kaikki muukki semmoset sähkövehkheet kannattaa merkata sillä laila, että ottaa niistä valokuvia ja laittaa sitte niitten valmiste- ja tyyppinummerot ittehleen muisthii johonki plankethiin. Net saattava olla toela arvokhaita tietoja polisille ja samala käypii se rikoksen syynääminen paljo kieremphään.
Silmät ja korvat höröhlään
Ihmiset valvovat kesälä paljon pitemphään ko talavela. Kaikki ihmiset ei kuitenkhaan ossaa olla ihmisiksi ja ilmanaikhanen pirruilu, kampheitten särkeminen ja toistensa mookkamiset työlistävät poliisia.
Poliisi ei kerta kaikkihaan kerkeä kahtheen paikhaan yhtä aikaa, ei ainakhaan! Soliski kerrala hyä, jos kansalaiset itte olisit valhmiit ilmothaan poliisille kaiken mailman pirruiluista ja muista pörröylyistä niinko ny tappeluista ja nuin. Epäjärjestystä ei tartte kenenkhään ympärilhään kestää, ja itte met kaikki siittä loppuin lopuksi laskun maksama.
Tornion poliissiin saapii yhteyen numerosta 112 ja rikosvastaahvaan numerosta 040-7643835.
Tornion poliisi halvaa toivottaa kaikile oikhein aurinkoista ja turvalista kessää!